Юзага келган кичик танаффусдан кейин мамлакат Олий лигасида 10-тур учрашувлари старт олди. Бугун – 15 июнь куни мазкур турнинг 4та беллашувига якун ясалди.

Сўнгги учта турда йирик мағлубиятга учраган Муборакнинг «Машъал» клуби Тошкент «темирйўлчилар»ига қарши ўйинда кўп гол ўтказиб юбормади. Беллашувнинг 13-дақиқасида Ислом Тўхтахўжаев томонидан киритилган ягона гол «Локомотив»га навбатдаги 3 очко тақдим этди. Қизиқ томони шундаки, «Машъал» сўнгги 5та турда ҳам рақиб дарвозасига гол ура олмаганди. Сўнгги марта Владимир Фомичев шогирдлари 13 апрелда «Олмалиқ» дарвозасига йўл топишганди.

«Локомотив» - «Машъал» 1:0
Гол: Ислом Тўхтахўжаев (13).

Бекободда бўлиб ўтган «Металлург» ва «Динамо» клублари ўйинида Русмат Мирсодиқов бошқарувидаги мезбонлар қийин ғалабани қўлга киритишди – 2:1. Иккинчи бўлимнинг учинчи дақиқасида Зоҳид Абдуллаев бекободлик футболчиларни олдинга олиб чиққан бўлса, 76-дақиқада Ахмад Убайдуллаев шогирдлари Шаҳзодбек Нурматовга гол уриш имконини яратиб беришди. 85-дақиқада Зафар Полвонов томонидан киритилган гол ҳисобни қисқартиришдан бошқасига ярамади – 1:2.

«Металлург» - «Динамо» 2:1
Голлар: Зоҳид Абдуллаев (48), Шаҳзодбек Нурматов (76) — Зафар Полвонов (85).

Янги бош мураббий – Тажмурод Агамуродов бошқарувида «Олмалиқ»ни қабул қилган «Бухоро» кичик ҳисобда имкониятни бой берди – 0:1. 89-дақиқада Александр Востриков томонидан киритилган ягона гол Игорь Шквирин жамоасига 3 очко тақдим этди. Мана саккизта ўйиндирки, бухоролик футболчилар зафар қуча олишмаяпти. Жорий мавсум ҳисобидан улар фақатгина бир марта – 2-турда «Андижон»ни сафарда таслим қилишган холос.

«Бухоро» - «Олмалиқ» 0:1
Гол: Александр Востриков (89).

Ўз аҳволини турдан-турга яхшилаб бораётган водийнинг «Андижон» клуби Зарафшонда «Қизилқум»ни мағлубиятга учратди. Беллашувнинг 33-дақиқасида мавсум тўпурари бўлиб турган Владимир Шишелов пенальтини аниқ амалга ошириб, меҳмонларни ҳисобда олдинга олиб чиққанди. 67-дақиқада зарафшонликлар сафида Ғулом Ўрунов ўзини кўрсатди. Бироқ меҳмонлар шу куни 1 очкога рози бўлишмади. 83-дақиқада Бекзод Ғозиев ўз номини таблрга ёздириб, жамоасига 3 очко тақдим этди. Қайд этиш керак, Равшан Ҳайдаров бошқарувидаги «Қизилқум»нинг бу мавсум бошидан бери ўз майдонидаги илк мағлубиятидир.

«Қизилқум» - «Андижон» 1:2
Голлар: Ғулом Ўрунов (67) — Владимир Шишелов (33-пен), Бекзод Ғозиев (83).